जिंदगीनी नाव

🌹जिंदगीनी नाव🌹

       *********

    ......नानाभाऊ माळी

मव्हरे मव्हरे जायी ऱ्हायनी

हायी जिंदगीनी नाव......

मांगे ऱ्हायी जायी गावं

मांगे ऱ्हायी जायी गावं...!धृ🌷

रंजी गांजी सवसार हावू

काढस डोयांनां  पूरं....

आवते भवते नातं गोतं

मनलें लायी जास घोर......🌷

पोरे सोरे जातींनं पऱ्हा

यांय बुडानां ये लें......

डोयांनां आंसू गयथीनं

कुडी सोडानां ये लें.........🌷

मन्हा मनलें बिवती ऱ्हायनू

ली एक एक सुखनां धागा

व्हायी ऱ्हायनी हिरदम्हा

पवतीर करी कुडीनी जागा..🌷

मव्हरे मव्हरे जायी ऱ्हायनी

जायी ऱ्हायनी जिंदगीनी नावं

मांगे ऱ्हायी जायी गावं....

मांगे ऱ्हायी जायी गावं........🌷

     🌹**********🌹

.....नानाभाऊ माळी

मु.पो.ता.शिंदखेडा.जि.धुळे

(ह.मु.हडपसर,पुणे-४११०२८)

मो.नं  ७५८८२२९५४६

        ९९२३०७६५००

दिनांक-०७जानेवारी२०२१

सद ईचार

ये जो ने

राब राबस खेतम्हा

🟢🔴🟢🔴🟢🔴🟢

अष्टाक्षरी काव्य

राब राबस खेतम्हा

राब राबस खेतम्हां

कसा रोज बाप मन्हां

खेती करस इमाने

तेन्हा एव्हढाज गुन्हां ...

बई म्हनतस बठ्ठा

बय कोन्ही देत नही

दय भाकरनं कसं

कोन्ही दखाडत नही ...

साल येस साल जास

हाल सरनात कोठे

म्हने पोशिंदा जगना

र्हास कोन्हा कोन्हा वठे ...

पिकाडस धान्य खेते

त्याले भाव भेटे नही

करा खर्च दाबीसन

ढेला परापद नही ...

खेय खेयस रोजना

करिसन अवकाया

कधी नही रे रडना

मोक्या करिसन गया ...

लेस कटाइन फास

दोन रोजना दुखोटा

करतस हयहय

खोटा दिखास मुखोटा ...

✍️कवी✍️

विजय व्ही.निकम

धामणगावकर ,चाळीसगांव

दि.६/१/२०२१

🟢🔴🟢🔴🟢🔴🟢

जिनगिनी हाई सगर

जिनगिनी हाई सगर

जिनगिनी हाई सगर

आते एकलाज चालस

कारभारीनना याद संगे

आते दिन उगस माव्यस ...

मन्हा संगे तिन्हं बी मी

आते पात्र भारी रंगाडस

या एकपात्रीम्हा सोताले

आते कसतरी रवाडस ...

गई ती सरगे सोडी माले

आते उतरस उतरती सगर

आंडेर सुखी से सासरले

पोरेसनी ईस्टन वर नजर ...

देवबा हाई धयडंपन कसं

आते नागफननं वाटे बोन्ड

जग दुनियाना लाजे काजे

गुताडेल से हात्तीनी सोन्ड ...

पिकेल से पान गई जाई

घडी दोन घडीना वकत

मी बी जासु तिन्हा मागे

आते हातम्हा नई से ताकत ...

ह्याज सगर धरी एक दिन

जानं से चार त्या खांदवर

ज्यासनी कधीज ढुकं नई

थकेल ह्याज धयडंपनवर ...

✍️कवी✍️

विजय व्ही.निकम

धामणगावकर, चाळीसगांव

दि.६/१/२०२१

☘️🌸☘️🌸☘️🌸☘️

खान्देशी लगीनना दांगडो**********************************************फुनकं

खान्देशी लगीनना दांगडो

**********************************************फुनकं ****************

घाली गयाम्हा कट्यार  

व्हयना घोडाव्हर स्वार

मांघे  वऱ्हाडीस्नी  हार

पुढे व्हल्लर वाजा चाले रे... राजबंदडं ...

नाचे  पोरेस्नी  जिवानी

तेस्ले  पर्जाना  तासानी

टाक धोये नाकनं पानी

गगननी चान्नी देखे खाले रे... राजबंदडं...

कान्ना पर्दा  ठोके  ढोल

टिपरीवाला नाचेत गोल

लेझीमना आयका बोल

वर्माय ती खुशीम्हा डोले रे... राजबंदडं...

तुन्हा  बाप  शे जमादार

चढना  मारोतीना  पार

फोडे  बंदूकना  बार

तुन्ही फुई फुनकं झेले रे... राजबंदडं....

========================================🙏😄🙏===========

प्रकाश जी पाटील +++++++पिंगळवाडेकर

=============================

गोड बोलाना वं सन

*[ई बुक अहिरानी बोली भाषेतील प्रकाशित कविता संग्रहातून ...]*

          गोड बोलाना वं सन

उनी उनी उतरानं 

गोड बोलाना वं सन

गोड बोला हायीच से

       तिय-गुयनं सांगन॥धृ॥

उनी उनी उतरानं 

हिनं निरायचं गानं

सांगा सांगा दुनियाले 

    गोडी गोड बोलाम्हान॥१॥

गोड बोलाना बी आठे

देखा करतस सन

गोड गोड बोला म्हने

        बठ्ठा भाऊबैनीस्वन॥२॥

द्यारे पलटाईसन

आतंकनं वावधन

मन्हा भारत महान 

      याना काय सांगू गुन॥३॥

दसराले बी उगना

आठे दिन व सोनाना 

झगमग देखा आठे 

      दिवा करे दिवायीना ॥४॥

   *--निसर्गसखी सौ. मंगला मधुकर रोकडे*

*शब्दसृष्टी*, मास्तरवाडी, नेहरु नगर, देवपूर, धुये .

दूरध्वनी क्र. ९३७१९०२३०३.

●●●●●●●●●●●●●●●●●●●

शब्दार्थ :- उनी =आली, उतरानं =संक्रांत, हिनं=हिच,  बोलाना=बोलायचा, सन=सण, तियगुय=तीळगुळ, निरायच=निराळच-वेगळच, गानं =गाणं, करतस=करतात, बोलाम्हान=बोलण्यामधे, बठ्ठा =सर्व,  भाऊबैनीस्वन =भाऊबहिनींनो, पलटाईसन =पलटवून, वावधन=वादळ, 

मन्हा =माझा, याना=याचा, दसर्याले=दसर्याला, उगना =उगवला, आठे=इथे,दिन=दिवस, सोनाना=सोन्याचा, करे=करतो, दिवायीना =दिवाळीचा. 

●●●●●●●●●●●●●●●●●●●

ज्योशिबा संस्कार

🙏🎀🙏🎀🙏

ज्योशिबा संस्कार

आशीज नही येस गोडी,अनमोल नाताम्हा,

जीव वतीन हरेकले जपनं पडत आंतरआत्माम्हा,

जग दखो हरदम आपलाज सोताम्हा,

देत लेत उभारी, गोडी शे माया जपाम्हा,

✒️ लेफ्टनंट डॉ.जितेंद्र देसले

रंगत संगत

सदईचार

रुपवती

खान्देशी लगीनना दांगडो

खान्देशी लगीनना दांगडो

=============================

केसर कस्तुरी गंगानं पानी, आंगणम्हा मारा सडा.

लाडा लाडीनी हायदले हाजर सनईसंगे चौघडा...

गंगा जमुना दोन्ही खेते

तठे काय देवपह्यांना रोपे

तठे काय सीताबाई काते

तठे काय कापुसना बेठे

नऊलाख चान्नीसम्हा चांदोबा जसा मन्हा लाडा //

ईसनू किसनू कांड्या भरे

राई रुक्मिणी पोयतं करे

तठनं पोयतं कोनले उनं

तठनं पोयतं लाडाले उनं

लेक पार्बतीना गणपती,देखा वाचस येदना धडा//

*************************************

****************कवी **********†******

प्रकाश जी पाटील..🙏🙏🙏पिंगळवाडेकर 😄

=============================

परनायला जाणे

≠========परनायला जाणे ==========

*************************************

दनदन.. दनदन.. दननन.. दनदन.......

छनछन.. छनछन... छननन.. छन छन....

दनदन करत चालणं हाई  गाडं,

मांगे पये लगीननी जान.....

हातोया सोडी गाठपलो मारी,

लौत हिरामोतिस्नी खाण..........//ध्रु //

तुन्ही वहिलीना चाकेंस्ले, सोनारूपान्या मांडोया

आवते भवते बसन्यात, तुन्या कंडोलनी सोया...

सर्ज्या राज्यानी खुरीस्ले, नाल सोनानी रे मारी

हायद लायीनी कम्मरले, भांदी शेलाम्हा कट्यारी

दन दन करत चालणं.......1

रंगीत छकडांना दुस्सेरले, लाल लोकेरना गोंडा

मन्ही बालंगी याहीनव्हर,आज चढाऊत बोन्डा..

त्या काकन्ना धागासंगे,जिकूत चिकनी सोपारी

उपर्नाम्हा भांधी आनुत, नव्वा सोयरानी कुवारी...

दन दन करत चालणं.......2

तुन्हा सासराना देव्हडीम्हा, बामन पंचांग वाची

धुमडाना तालव्हर मोती, तुन्हा बाशिंगना नाची

शीव उनी रे धुरकरी, आठे थांबाड तुन्हा टांगा

वाजत गाजत लेवाले या, याहीले निरोप सांगा

दन दन करत चालणं.......3

============================

****************कवी ****************

--------प्रकाश जी पाटील... पिंगळवाडेकर ------

=============================

अहिराणीनी विश्वव्यापी घोडदौड! आनंदाचे डोही आनंद तरंग!

💃🏻🏇🏻💃🏻🏇🏻💃🏻🏇🏻💃🏻🏇🏻💃🏻🏇🏻💃🏻🏇🏻💃🏻

             अहिराणीनी विश्वव्यापी घोडदौड!

                  आनंदाचे डोही आनंद तरंग!

➿➿➿➿➿➿➿➿➿➿➿➿➿

              बठा अहिर भाऊ बहिनीसले खुश खबर से. आपलं विश्व अहिराणी सम्मेलननी कमाल करी. जग दुन्याना एक लाखना वर प्रेक्षक यामा सहभागी व्हयनात. त्यामुये यानी दखल गूगलनी लिदी. नी त्यासनी त्या बद्दल उत्तरमहाराष्ट्र खान्देश विकास मंडळले पत्र धाडीसनी अभिनंदन कर. हाई खूप मोठी गोष्ट से. हाऊ अहिराणींना, अहिराष्ट्र कान्हादेशना, जगदुन्यामा पसरेल 2 कोटी अहिरासना मान, सन्मान, गौरव से. अहिराणी भाषांना डंका त्रैलोक्यमा नी 5 खंडमा वाजी ऱ्हायना. हाई आभिमाननी गोट से. 

           आजून एक आनंदनी गोट से. अहिराणींनाना पायवर पाय ठेवत मराठी भाषा बी पहिलं ऑन लाईन विश्व मराठी सम्मेलन ली ऱ्हायनात.  अहिराणी संमेलनन्या  तारखा 26, 27, 28 डिसेंबर 2020 ते मराठीन्या तारखा सेत, 28, 29, 30, 31 जानेवारी 2021 सेत. त्यास्ना आपला बी विषय सारखाच सेत. ऑन लाईन विश्व अहिराणी सम्मेलन हाई, सर्व भाषास्ना करता रोड मॉडेल ठरन, हाऊ अहिराणींना दिमाख से. 

*घरेघर संदेश।सोनाना कान्हदेश।।*

*आपली भाषा आपली वाणी।*

*अहिराणी माय अहिराणी।।*

💃🏻🏇🏻🙏🏻🏇🏻💃🏻 बापू हटकर

💃🏻🏇🏻💃🏻🏇🏻💃🏻🏇🏻💃🏻🏇🏻💃🏻🏇🏻💃🏻🏇🏻💃🏻

एक कायले

☘️🌸☘️🌸☘️🌸☘️

एक कायले

व्हतु मी बी एक कायले

नामी भलता कार्यकर्ता

झेंडा पार्टीना हाते धरी

झुंगी धरू नेतानी कुरता ...

आशा भलती वाईट हो

मिरीगजय ती बनी जाये

मी तिन्हा मांगे मांगे पवू

ती आखो दूर पयत र्हाये ...

गंजक वरीसलोग हाऊ

चालना खेय आशावादी

शिखी लिखी नशिबम्हा

भेटनी ती खस्तास्नी गादी ...

घरन्या भाकरी खाद्यात

उखल्लावर हुभा राही

दिन वरीस सरत ग्यात

नवकरीनं वय ग्ये वाही ...

बेकार झावू तवय कयन

आपला वापर व्हई ग्या

हातमाईन काम ग्ये निघी

कामना हेडया वाकी ग्या ...

नेता मातर कार्यकर्ताना

खेय करी ग्या तो भारी

आम्हनी मातर इकडे

वाया गई अक्कल हुशारी ...

गल्ली पाईन दिल्ली लोग

शेतस बठ्ठा आठे पुढारी

त्यास्नी दावनले कार्यकर्ता

बिनकामी फुल अधिकारी ...

वेय ग्या वय ग्ये हाते

काहीज ते उरनं नही

कार्यकर्ता बनी कोन्हा

पोट सुद्धा भरनं नही ...

व्हा चांगला नेताना

चतुर कार्यकर्ता खरा

पन तेन्हा पयलेंग व्हा

माय बापना छोकरा ...

✍️✍️✍️

कवी विजय व्ही.निकम

धामणगावकर, चाळीसगांव

दि.४/१/२०२१

☘️🌸☘️🌸☘️🌸☘️

झायं आपुरं आभाय

[अहिरानी खान्देशी बोली भाषा]                                    

     *झायं आपुरं आभाय*

जोतिबानी वं अस्तुरी 

मन्ही सायतरा माय

माय शिकनी व साय

         ग म भ न र्हास काय ॥धृ॥

शिकी सवरीनी माय 

उनी शिकाडाले साय

माय आम्हना करता

         झायी सारसता माय ॥१॥

नही ठाऊक आम्हले 

न्यानेसरी र्हास काय

ग्यान शिकाडे आम्हले 

           एक सायतरा माय॥२॥

दीन अनाथ लेकरु

मन्ही साऊ नी समायं

माय झायी सेवाभावी

        दिनरात खस्ता खाय ॥३॥

आशी व्हयी गयी माय

मन्ही सायतरा माय 

हिना मुयेच आम्हले 

        आज आपुरं आभायं ॥४॥

    *--निसर्ग सखी सौ मंगला मधुकर रोकडे.*

*शब्दसृष्टी*, मास्तरवाडी, नेहरु नगर, देवपूर, धुये. 

दूरध्वनी क्र. :-९३७१९०२३०३.

शब्दार्थ-- अस्तुरी =पत्नी, मन्ही =माझी, सायतरा =सावित्री,  साय=शाळा, र्हास=राहते, उनी=आली, सारसता=सरस्वती झायी=झाली, ग्यान=ज्ञान, न्यानेसरी =ज्ञानेश्वरी, समायं=सांभाळलं, व्हयी गयी=होऊन गेली, हिनामुये =हिच्या मुळे, आभाय=आभाळ, आपुरं=अपुरं अपूर्ण.

  ~~~~~~  ~~~~~~~~~~  ~~~~~~

खान्देशी लगीनना दांगडो खान्देशी लग्न पध्दती

 खान्देशी लगीनना दांगडो 😄

*********†*************

मांडो.... बे, माथनी....😄🙏

*************************************

खंत्या.. खंतीले बलावा, हायद शे कोना हातनी

वाजत गाजत उना मांडो, गाडा मांडो बेमाथनी //

राम सीताना जोडपाले,

गाठ पलो पक्का भांदा...

कुस्सा दिसन आंगणमा,

मांडोना डर आते खंदा....

देवबामन्ना जामीनम्हा,लावा पणती तुपना वातनी.

कोरी माथनी कुम्हारघर्नी,

हायद लायी परनी टाका...

टाका गयामा माय पोयतं,

पानी ओती वरथून झाका...

वल्ला कुकूनी काढा वं,नक्षी न्यारा न्यारा भातनी..

=============================

============कवी ==============

प्रकाश जी पाटील......... पिंगळवाडेकर..........

*************************************

*************************************

गझल मन्ही बोलस अहिराणी गझल

 💫⚜

*◆गझल मन्ही बोलस..◆*__

💫☘ *गझलवृत्त-सौदामिनी*

________________________

नदारी दुन्याले दखाडू नको

कमाई लुटीनी कमाडू नको

रिकामा गया जो जगाले उना

लबाडी करी धन दपाडू नको

हयाती घडीनी भरोसा नही

फुकट देहले तू सजाडू नको

सहारा बनीस्नी उभारी दिन्ही

भिडू त्या कधीबी फसाडू नको

खरी संपती जप परीवारनी

जलम देवतास्ले कटाडू नको

पसारी पथारी सदानीकदा

सुखी मैतरस्ले सताडू नको

टिलकचंदबी भो उताना पडस

हुशाऱ्या करी जग चगाडू नको

✍🏼©️ *कवी-देवदत्त बोरसे*✍🏼

नामपूर ता.बागलान जि.नाशिक.

*9421501695*

_____________________▪⚜

जलमदेती अहिराणी माय

 🌹जलमदेती अहिराणी माय🌹

            ***********

       ......नानाभाऊ माळी

🌷अमृतमाय जिभवर

सदा कदा झिरपत ऱ्हास

खान्देशनां भाउ आपुन

अहिरानीमां निरोप जास..!🌹

🌷जिभवरनां कव्या बोलं

कुढीम्हा बठेल कायेज व्हास

नको वाटालें सरम आम्हलें

माय जलमदेती ऱ्हास......!🌹

🌷जग-दुन्याम्हा कोठे भी जावा

तोंडे मातर अहिराणी ऱ्हावो

मांगे-मव्हरे एक दिन बठ्ठ

अहिरानीनं इद्यापीठ व्हवो..!🌹

🌷दारनां मव्हरे मावशी बोला

सायम्हा परायी इंग्रजी बोला

जलम देतीगुंता आते भाउ

अहिरानींनां स्वर्ग खोला....!🌹

        🌺*******🌺

    ...नानाभाऊ माळी

मु पो ता शिंदखेडा जि धुळे

ह मु हडपसर, पुणे-४११०२८

दिनांक-२५डिसेंबर२०२०

🌹🌷बठ्ठा अहिरानींना लाल!हिरा-माणिक!भाउभन!धनगोत!ध्यानमा ठेवा २६,२७,२८लें जगन्हा अहिरानींना मोती तुम्हलें दानम्हा भेटनार सेतस!या ग्यान मोती लेवागुंता बठ्ठा विश्वनां भाउ-बहिनी तयार ऱ्हावा!🌺🌷🌹🙏😌

मायबोली आहिरानी

 

☘️🌸☘️🌸☘️🌸☘️

*अष्टाक्षरी काव्य*

*मायबोली आहिरानी*

पडनूज नस्तू तुन्हा
पिरेमना चक्करम्हा
तर माले कयत का
जादू से तुले बोलाम्हा ...

म्हनीसन मी बोलस
हिरदना कोनाथुन
आते लिखस मी तुले
हौस नी आवडथुन ...

मायबोली मन्ही से तू
माय मन्ही आहिरानी
दूध वरनी साय तू
बोलो ते वाटस लोनी ...

कोन काय म्हनी हाई
लाज आते वाटत नै
तुले बोलाना बिगर
दिन मन्हा उगस नै ...

तुन्हा इतिहास भारी
तुन्हा महिमा जगम्हां
याद तुले करी डंका
वाजतस विदेशम्हा ...

मंग आपीन काबरं
मागे र्हावो खान्देशीस्नी
मायगुंता लटकूत
आते कंबर कसीस्नी ...

मायबोली आहिरानी
भाषा से कान्हदेशनी
तिले करूत जतन
बठ्ठा आहिर जमीस्नी ...

मंग आहिरानी माय
देखा कसी सुखी व्हई
धनगोत एकमांडे
देखा नक्की गोया व्हई ...

✍️कवी✍️
विजय व्ही.निकम
धामणगावकर, चाळीसगांव
दि.२६/१२/२०२०

☘️🌸☘️🌸☘️🌸☘️

माय अहिरानी अहिराणी कविता

 माय अहिरानी

मन्ही अहिरानी बोली 

तिन्हा कसा गाऊ गुन... !

मराठीना कपायले 

सोभे आभिरनि खूण... !1

अहिरानी अहिरानी 

धार तापीनी नित्तय..... !

सोनं खान्देशनं हाई 

बाकी चौफेर पित्तय.... !2

गोड अहिरानी बोली 

जसं त्ये उसनं कांड.....!

आनी रांगडीबी तसी 

ठोके कुऱ्हाडले दांड....!3

जसं शबरीनं बोर 

थोडं गोड थोडं खट्ट.... !

मन्ही अहिरानी भाषा 

काया समारनं बट्ट.......!4

ग्यानेसरी छातीठोकी 

पाजे अमृतना घोट ........!

मन्ही अहिरानी तिले  

दाये सहदनं बोट........ !5

मऱ्हाठीना दरबारे 

गर्जी उनी अहिरानी..... !

बेरी काढेल मी तूप 

मगं..मगं.. गावरानी..... !6

मन्हा मायना व्हटस्नी 

भाषा जीवथून प्यारी.... !

तीन्ह सम्मेलन वाटे 

माले पंढोरीनी वारी......!7

🙏🙏🙏🙏🙏🙏

...........कवी............ 

प्रकाश जी. पाटील 

पिंगळवाडेकर.

गुण खान्देशी मातीचा

 गुण खान्देशी मातीचा

घ्यावा जरा उसना

गुण खान्देशी मातीचा 

असा आमुच्या मनात

         गुण गोडी गुलाबीचा॥धृ॥

गोडी सार्यांना वाटतो

इथे सण संक्रांतीचा

अरे अतिरेकी सोड

         तुझा धंदा आतंकचा॥१॥

बघ जरासा बोलून

बोल आमुचा सोन्याचा

बोल सोन्याचा बोलून

         होतो दसरा सोन्याचा॥२॥

बघ माझ्या खान्देशात 

सण येतो प्रकाशाचा 

प्रकाशित होतो पहा

          काना कोपरा देशाचा॥३॥

मना -मनात जागतो

दिप इथे दिवाळीचा

कण कण धरतीचा

          उजळीत आकाशाचा॥४॥

     *--निसर्गसखी सौ. मंगला मधुकर रोकडे.*

*शब्दसृष्टी*, मास्तरवाडी, नेहरु नगर,देवपूर, धुळे.

दूरध्वनी क्र. :-९३७१९०२३०३.

○○○○○○○○○○○○○○○○○○○

खान्देश अहिराणी कविता

 🌷🌹खान्देश🌹🌷

           *********

      ....नानाभाऊ माळी

 

कोनी कन्न म्हनंस तुले

कन्नडनां घाट छावलें

कोनी कान्ह म्हनस तुले

कृष्णानं रंग रुपले.....🌺!

तून्हा भाऊभन नी गोट

घरमा कानबाईनां रोट

आंगे विंध्य सातपुडा

टाचं मारी पये घोडा..🌺!

 तथा बऱ्हाणपूरलें पयेनां

तून्हा झेंडा गाडी वूना

खुरव्हरी उना करी खुणा

धडक राहुल बारीलें वूनां.🌺!

दगड माटीन्ह्या सेंत खानी

कये सोनानं रे पानी

भुरंट खुरटम्हा तू दपेलं

पडीत खाट्यानी कहानी!...🌺!

किल्ला हुभा ताट भामेरं

मव्हरे लळीगं से थायनेरं

 व्हाये दूध तूपनां महापूर

खान्देश गायी म्हैसीस्ना घर.🌺!

केयी कपाशीन्ह्या खानी

किर्र जंगल मांगस पानी

आभीर गोतनां तू राजा

अहिर भाषानी कहानी...🌺!

राज करे शूर गवई राजा

खड्डाम्हा बठेल खान्देश

मोजा पायव्हरी कान्हदेश

तापी गिरणांना मन्हा देश..🌺!

        🌹*********🌹

      ....नानाभाऊ माळी

(मु.पो.ता.शिंदखेडा.जि.धुळे)

ह मु हडपसर, पुणे-४११०२८

  दिनांक-२८डिसेंबर२०२०

विश्व अहिराणी साहित्य संमेलन लें मनःपूर्वक शुभेच्छा🌷🌷🌹👏

याद करसू जतन अहिराणी कविता

 याद करसू जतन

उना आखरी महिना 

उना आखरी बी दिन

नवा साल संगे धाड

        हाशी खुशीना बी दिन॥धृ॥

याद तुन्हा बी ठेवसू

सुखं दुखंना रे दिन

सुख संगे दुखना बी

            याद यिथिनच दिन॥१॥

एक येस एक जास

तंतर से दुनियान

दुनियाना संगे ते बी

              पडसचं निभायनं॥२॥

नवा सालम्हा जावाले 

नही वयसं रे मन

तुन्ही याद बी करसू 

             देख मनम्हा जतन॥३॥

तुन्हा बिगर पुढेना

कसा कयथिन दिन

तरी त्याना स्वागतले

           जाऊ म्हणस रे मन॥४॥

     *--निसर्गसखी सौ. मंगला मधुकर रोकडे.*

*शब्दसृष्टी*, मास्तरवाडी, नेहरु नगर, देवपूर, धुळे.

दूरध्वनी क्र. :-९३७१९०२३०३

:::::::::::::::::::::::::::::::::::::::::::::::::::::::::::::::::::::