माय अहिरानी
मन्ही अहिरानी बोली
तिन्हा कसा गाऊ गुन... !
मराठीना कपायले
सोभे आभिरनि खूण... !1
अहिरानी अहिरानी
धार तापीनी नित्तय..... !
सोनं खान्देशनं हाई
बाकी चौफेर पित्तय.... !2
गोड अहिरानी बोली
जसं त्ये उसनं कांड.....!
आनी रांगडीबी तसी
ठोके कुऱ्हाडले दांड....!3
जसं शबरीनं बोर
थोडं गोड थोडं खट्ट.... !
मन्ही अहिरानी भाषा
काया समारनं बट्ट.......!4
ग्यानेसरी छातीठोकी
पाजे अमृतना घोट ........!
मन्ही अहिरानी तिले
दाये सहदनं बोट........ !5
मऱ्हाठीना दरबारे
गर्जी उनी अहिरानी..... !
बेरी काढेल मी तूप
मगं..मगं.. गावरानी..... !6
मन्हा मायना व्हटस्नी
भाषा जीवथून प्यारी.... !
तीन्ह सम्मेलन वाटे
माले पंढोरीनी वारी......!7
🙏🙏🙏🙏🙏🙏
...........कवी............
प्रकाश जी. पाटील
पिंगळवाडेकर.
कोणत्याही टिप्पण्या नाहीत:
टिप्पणी पोस्ट करा