जिनगिनी हाई सगर
जिनगिनी हाई सगर
आते एकलाज चालस
कारभारीनना याद संगे
आते दिन उगस माव्यस ...
मन्हा संगे तिन्हं बी मी
आते पात्र भारी रंगाडस
या एकपात्रीम्हा सोताले
आते कसतरी रवाडस ...
गई ती सरगे सोडी माले
आते उतरस उतरती सगर
आंडेर सुखी से सासरले
पोरेसनी ईस्टन वर नजर ...
देवबा हाई धयडंपन कसं
आते नागफननं वाटे बोन्ड
जग दुनियाना लाजे काजे
गुताडेल से हात्तीनी सोन्ड ...
पिकेल से पान गई जाई
घडी दोन घडीना वकत
मी बी जासु तिन्हा मागे
आते हातम्हा नई से ताकत ...
ह्याज सगर धरी एक दिन
जानं से चार त्या खांदवर
ज्यासनी कधीज ढुकं नई
थकेल ह्याज धयडंपनवर ...
✍️कवी✍️
विजय व्ही.निकम
धामणगावकर, चाळीसगांव
दि.६/१/२०२१
☘️🌸☘️🌸☘️🌸☘️