[चारोळ्या जात्यावरच्या]
(अहिरानी बोली)
१]माय माय करु माय
माय मनम्हा वावरे
सावरस मी घरले
जशी माय वं सावरे॥
२]बाप बाप करु बाप
करु बापना वं जप
जाऊ बापना भेटले
माहेरले झपझप॥
३]माय माय करु माय
माय सोनानं से नानं
माय बाई मन्हा घर
तुले पहिला से मान॥
४]भाऊ भाऊ करु भाऊ
भाऊ मुयं मी बलाऊ
भाऊ सासर माहेर
दोन्ही कुयंम्हा मिराऊ॥
५]कसं सांगू घट्या तुले
काय मनम्हा रे दाटे
काटा नितनाच आठे
मन्हा सासरना वाटे॥
६]नको सोदू शेजीबाई
कशी मन्ही से वं सासू
कांदा चिराना वखत
डोया दाटतस आसू॥
--निसर्गसखी सौ. मंगला मधुकर रोकडे
शब्दसृष्टी, प्लाॅट नं. ७ अ, नारायण नगर, धरणगांव चौफुली रोड, एरंडोल जि.जळगांव.
दूरध्वनी क्र. :- ९३७१९०२३०३.
==============================
सोनानं=सोन्याचं, नानं=नाणं, मन्हा =माझ्या, मुयं=मुळ
कुयम्हा=कुळामधे, मिराऊ=मिरऊ, घट्या=जातं (घरोटा), मनम्हा =मनामधे, काटा=काटे, नितनाच=नित्याचेच, आठे =इथे, वाटे=मार्गात, सोदू=विचारु, शेजीबाई =शेजारीण, वखत=वेळेला, डोयाम्हाना =डोळ्यामधले.
===============================
घट्यावरन्या चारोया
[खान्देशी अहिरानी बोली भाषेतील]
७} काय देऊ लेकी तुले
देऊ सोनाना आईना
नांव अंबरे जाऊ दे
दुनियाम्हा आईबाना॥
८}मन्ही वहिनी वहिनी
वाटी साखर दहिनी
जशी सोबतीन मन्ही
देखा धाकलपननी॥
९}माय ममताना झरा
बाप घरना आसरा
एकमेक ना बिगर
कोन समायी पसारा॥
१०}माय सारखं ना कोन्ही
बाप बाहेरना धनी
माय बापना बिगर
आख्खी दुनिया से सुनी॥
११}कोठे देखताच साप
म्हनतस आरे बाप
माय ममता अमाप
बाप देखे याप ताप॥
१२}माय माय करु माय
माय बिगर ना घर
नही येस वं कोनले
माय माऊलीनी सर॥
--निसर्ग सखी सौ मंगला मधुकर रोकडे.
शब्दसृष्टी, प्लाॅट नं. ७ अ, नारायण नगर, धरणगांव चौफुली रोड,एरंडोल जि.जळगांव.
दूरध्वनी क्र. :- ९३७१९०२३०३.
===============================
तुले =तुला, सोनाना=सोन्याचा, आईना=आरसा, अंबरे=आभाळापर्यंत,मन्ही =माझी, दहिनी=दहिची, सोबतीन =मैत्रिण, धाकलपननी =बालपणीची, समायी=सांभाळेल, आख्खी =सगळी, याप-ताप=व्याप ताप, येस=येते, कोनले=कुणाला.
॥॥॥॥॥॥॥॥॥॥॥॥॥॥॥॥॥॥॥॥॥॥॥॥॥॥॥॥॥॥॥
चारोया-घट्यावरन्या
(अहिरानी खान्देशनी बोली भाषा)
१३]माय माय करु माय
जाऊ मायना भेटले
कशी सांगू जान से वं
सासू सासरा जेठले॥
१४]मनम्हानी हूरहूर
कोना जोडे वं बोलसू
घट्या बोले घरंघरं
गोट तठेच खोलसू॥
१५]आखाजीले दिवायीले
याद मायनी वं येस
माय माहेरना गावं
मंग पाऊल वयसं॥
१६]बाप बाप करु बाप
बाप माले बलावस
सने सुदे याद करी
देखा मुयं बी लावसं॥
--निसर्गसखी सौ मंगला मधुकर रोकडे
शब्दसृष्टी, मास्तरवाडी, नेहरु नगर, देवपूर, धुये.
दूरध्वनी क्र. :-९३७१९०२३०३.
-----------------------------------------------------------
जानं से वं=जायचं आहे ग, मनम्हानी =मनातली, कोना जोडे =कुणा जवळ, बोलसू=बोलणार, गोट=गोष्ट बात, तठेच=तिथेच, खोलसू=खोलणार बोलणार, आखाजीले =अक्षय तृतीयेला, येस=येते, मंग=मग, वयसं=वळतं, माले=मला,बलावस=बोलावतो, मुयं=मुळ, बी=सुध्दा, लावस=लावतो.
----------------------------------------------------------------
कोणत्याही टिप्पण्या नाहीत:
टिप्पणी पोस्ट करा