रामना पहारे । दाटी व वसनी ।
पांधी बुंजायनी । वावरनी॥१॥
सुरू जया दिन । सारजा मायना ।
सडा गोतमाना । आंगलम्हा॥२॥
वना वासुदेव । दे सुपड भर ।
मायना बिल्लोर । हात भरी॥३॥
खोपाम्हान उठे । चिडी नी कोकीय।
दये भवजाय । लोकवान ॥४॥
जोत्याम्हान गाय । पाजे का-हडले ।
राजा सरजाले । टाक खोंडे॥५॥
पिसन वसले । हिवज पानेस्ले।
न्हावाड झाडेस्ले । चारीमेर॥६॥
तापीनी ती थडे। डोंगरनी आंगे।
पैरे भांगेभांगे । तो आबीर॥७॥
टाक तुयशीले । रांझनमा पानी ।
काने काकडानी । घंटा वाजे॥८॥
सुवासीन उठी । भारी आचपय।
चुल्हाना धुक्कय । डोयाम्हान ॥९॥
माहेरनी याद । हिरदम्हा गाना ।
भाऊ तो पाव्हना । हाड्या सांगे॥१०॥
राम पहारन । चाले कीरतन ।
भारी आवसान । भूईवर ॥११॥
कितल कौतीक । नारायन तुन्ह।
घर भरे मन्ह । उजायान॥१२॥
इठू रोज सक्ती । कथाइन देस।
गया कालदिस । नवा वुना॥१३॥
वनू इनवन्या । करे हात जोडी।
भक्तीनी बी गोडी । लाइस बा ॥१४॥
वनमाला पाटील जालना
काशी कन्या लिव्हस काव्य संग्रह
