😄 निवडणूक😄

 😄  निवडणूक😄

🙏🙏🙏🙏🙏🙏

================

दर  पाच  वरिसम्हा

येस  वाजत  गाजत...

ऊनं  हाई  इलेक्शन

दारू दर्फडा पाजत.......1

दर  पाच  वरिसम्हा

त्याच इटेल तमासा...

कुत्रा चघयी रे देखा

रोज मटण नी मासा......2

जेनी पत शे रे बांडी

तोच निवडम्हा हुबा...

चार चत्रा लांडगास्नी

ढाण्या वाघलेच दाबा.....3

झाई लोकशाही खट्टी

मन  रोज  तीन्हं  तुटे...

उठे   नंगेशाही..रोज 

अन  लोकशाही लुटे......4

समाजना आरसाम्हा

जेन्ह तोंड दिसे कायं...

तोच  धराले  पयस

सिंघासन्ना च्यारी पाय....5

जसं  एक  कुत्रीमांघे

चौदा कुत्रास्नं गव्हारं...

तसं  हाई  खुर्चीसाठे

कोन्ही कालर सव्हारं.....6

जसा पाची पांडवस्नी

लिन्हा धुर्पतीम्हा वाटा...

खुर्चीलोंग भिडासाठे 

कोण कसा लाये साटा...7

काय नाव ठेऊ त्येंस्ले

बाता करस मी मोठ्या...

सस्ता इकावस मी भी

दोन घोट, दोन बोट्या....8

======================कवी ======

प्रकाश जी पाटील..........

.............. पिंगळवाडेकर

================

कालदिन रातले धुळ्याम्हा पाऊस पडना त्या करता हायी कविता.

 *[ कालदिन रातले धुळ्याम्हा पाऊस पडना त्या करता हायी कविता...]*   

     *हिवायाम्हा पाऊस रे*                                                                       

हिवायाम्हा पाऊस रे

तुले कोन बलावसं

येता येता सांग तुले

         हिवं नही का वाजसं॥धृ॥

बिन बलावाना सांग 

कसा पाव्हना तू यसं

पानी पाऊसना दिन

           वाट देखाले लावस॥१॥

जसा तुन्हा पावसाया

तसा हिवाया बी र्हास 

देख हिवाया बी र्हास 

          दिन मान ना रे खास॥२॥

तुन्हा बिगर धरनी

माय मन्ही  रे रडसं

तिन्हा करता कसा रे

             नही तव्हयं पडस॥३॥

बयं तूच से बयीनं

तुले हात तो जोडसं

तुन्हा बिगर तव्हयं

         पिके त्याना बयतसं॥४॥

त्याना तमासा देखस

नही तव्हयं पडस

हिवायाम्हा पाऊस रे

         तुले कोन बलावसं॥५॥

    *--निसर्गसखी सौ. मंगला मधुकर रोकडे.*

*शब्दसृष्टी*, मास्तरवाडी, नेहरु नगर, देवपूर, धुये.

दूरध्वनी क्र. :-९३७१९०२३०३.

...................................................................

हिवायाम्हा =हिवाळ्यात, तुले=तुला, बलावस=बोलावतो,

हिव=थंडी, वाजस=वाजतो, बिन बलावाना=बिना बोलवायचा, यस=येतो, पाव्हना=पाहुणा, लावस=लावतो,

पावसाया =पावसाळा, र्हास =राहतो, तुन्हा =तुझा, बिगर=शिवाय, मन्ही =माझी, तव्हय=तेव्हा, बयं=बळ, बयीनं=बळीचं, बयतस=जळतात. 

........................................................................

😄निवडणूक 😄

 😄निवडणूक 😄

================================

देखा  निवडणूकम्हा

पुढारीनी.... धडपड...

बाजरीम्हा लहयेराये

जसा चिकनीना भड......1

दर   पाच   वरिसम्हा

तोच नितना कुटाणा...

पैदा   गायेगाव  करा 

पुढारीस्ना कारखाना.....2

ज्येनी कापायेल खाट 

गाते मुडी ग्ये खाटनं...

मारे  झरपडा  तो बी

माल्हे  नवल  वाटणं......3

घर सम्हाव्हानं शिक

मंग  चलावा  रे गाव...

तुन्ही करनीम्हा देख

तुन्हा निकालनी नाव.....4

नाच्यानीच भांदो बरं

दोन्ही पायस्मा घुंगरू...

सरीभर्से  दोरी  भांदी

नको  फुकटम्हा मरू......5

खुर्ची नुस्ती नही खुर्ची

तिल्हे चारी पाय नशा...

तुन्ह  कम्मर ती मोडी

जग   देखी   उठबशा.....6

खुर्ची   म्हंजे   राजधर्म 

तीन्ही राखसी का पत...

नही  भेटावं  रे  तुल्हे 

मन्ह  आमुलिक   मत....7

================================

*********कवी********

प्रकाश जी पाटील /////////

//////////////पिंगळवाडेकर

********************

😎बाप्पाना चष्मा😎

 😎बाप्पाना चष्मा😎

बोट्यास्न मटण न  कस रटरट शिजी ह्रायन्ह ..

दारुन आंधण कस खयखय उकाई ह्रायन्ह...

मायच्यान भो मन्ह बी गाव आज इकाई ह्रायन्ह...

जुवारी नी सपथ नी पोरस्नी सपथ लेव्हायीह्रान्ह...

घरना देव्हारा न देवपण हाली ह्रायन्ह...

लंगड्या देव बी कसा डांगेडांग पयी ह्रायन्हा...

मायच्यान भो मन्ह बी गाव आज इकाई ह्रायन्ह...

गांधी बाप्पा नोटवर हाशी ह्रायन्हा....

बाप्पानी आंधी लोकशाही चष्मा दखी ह्रायन्हा...

आंधा मतदारस्ले पाच वरीस करता...

बाप्पाना चष्मा पाचशे, हजार ले इकाई ह्रायन्हा

मायच्यान भो मन्ह बी गाव आज इकाई ह्रायन्ह...

           त्रिवेणीकुमार

🌹निवडणूक 🌹

 🌹निवडणूक 🌹

****************************************

भाऊबंद ऱ्हास काय

फ़ांद्या पारंबीस्ना वड...

झाड डौलदार त्येल्हे

पाडे   पंचायत   तड......1

झाया  निवडना पाये

भाऊ  भाऊनाच वैरी...

एक डंगना ह्या आंबा

गोडी कोन्हाजोगे थैरी....2

येरायर्ले.. देखी.. देखी

दौडे दोन्हीस्ना खकारा..

नाथे  चढनात  दोन्ही

त्येंस्ना मातना व्हकारा...3

एक  दामूना  गटम्हा

एक  शामूना  तटम्हा...

थुक लाई नामू  ठोके 

जाडी पाचेर  फटम्हा.....4

येस्ना धीरावाले कोन

काया सडेल भिलावा...

नांदे लागीसनी त्येंस्ना

भीत  सोडे रे गिलावा....5

रोज काना कोपराम्हा

उड्या  मारे  टँगो पंच...

त्येनी  भांदसू  दर्जाले

तुल्हे  कर्सु🌹सरपंच....6

नका पैरा रे 🙏जहर

नका  करू रे  इदासा...

पाच   वरिसना  साठे

नको पिढीना तमासा.....7

हाई   निवडले   देखो

जसा  कबड्डीना  डाव...

नको  ईर्षाना  गुलाल

नका  भंगाडा  रे  गाव....8

================================

********कवी ********

प्रकाश जी पाटील ----------

---------------पिंगळवाडेकर

================

हायी आम्हनं से धन

 हायी आम्हनं से धन

उनी उनी उतरानं

हिनं न्यारच से गानं

गोड गोड बोला म्हने

       हिनं हायी से गर्हानं॥धृ॥

मन्ही खान्देशी खान्दानी

हिनं भाबड से मन

हिना बोलीम्हाच हिनं

          देखा दर्सन घडनं॥१॥

आठे नित उतरानं 

काय सांगशी गर्हानं

एक ठाऊक आम्हले

          नित गोडच बोलानं॥२॥

बोली आम्हनी से भोयी

भोयं आम्हनं से मन

मनं आम्हना सारखं 

           नही कोठे दखायनं॥३॥

हायी आम्हनं से धन

आसा आम्ही धनवान 

याम्हा मिटस आम्हनं

              बठ्ठ वारा वावधन॥४॥

      *--निसर्गसखी सौ मंगला मधुकर रोकडे*

*शब्दसृष्टी*, मास्तरवाडी, नेहरु नगर, देवपूर, धुये. 

दूरध्वनी क्र. ९३७१९०२३०३.

••••••••••••••••••••••••••••••••••••••••••••••••••••

शब्दार्थ :- उनी=आली, उतरानं =संक्रांत, हिनं=हिचं, न्यारच=निराळच, से=आहे, गानं=गाणं, हायी=हे, गर्हानं=गार्हाणं, मन्ही =माझी, बोलीम्हाच=बोलीमधेच, देखा=पहा, दर्सन=दर्शन, घडनं=घडलं, आठे=इथे, नित =रोज, आम्हले =आम्हाला, बोलानं=बोलायचं, भोयी=भोळी,  भोयं=भोळं, कोठे=कुठे, दखायनं=पाहण्यात आलं, याम्हा=यामधे, मिटस=मटतं, आम्हनं=आमचं, बठ्ठ=सगळं,  वारा-वावधन=भांडण तंटा, 

•••••••••••••••••••••••••••••••••••••••••••••••••••••

मन्ह कोठे चुकायन

 मन्ह कोठे चुकायन

बायकोनी मैतरीननं तीळगुळ म्हणीसन माले हलवा दिना अन म्हणे तीळगुळ ल्या गोड गोड बोला. मी म्हणतं, वहिनी फक्त यानावरी तोंड कशे गोड व्हई. ती मैतरीन इश्य म्हणीसन चालानी गयी. तितलामा बायको जोरमा म्हणे मी काय कधी तरफडणू का तीन्हा जवळ तोंड गोड कराले मांगतस. त्यानी मायनी उपाद मारु, माले तीळगुळना लाडू जोयजे व्हता. तीले लाजाले अन ईले रूबाब कराले काय झायं.

🙏रामकृष्णहरी 🙏