🤔🤔👆👆🤔🤔
*पिरिमना चक्करम्हा*
पिरेमना चक्करम्हा
तू वाया नको जाऊ
तिन्हा मागे फिरीसन
तू साल नको बुडाऊ ।।धृ।।
राबी खेते मायबाप
पोटले देतस चिमटा
तुन्हा गुंता करतस
दिनरात येक भाऊ ।।१।।
लिखी शिकी शाया
व्हयजो खरा ग्यानी
भेटी तुले नवकरी
येळ वाया नको घालू ।।२।।
वाट तुले दखाडेत
त्या मायबाप गुरू
कलपात तेसना तू
कधी नको इसरू ।।३।।
नदारीना सौसार तो
कया तेसनीज खरा
दुस्कायना फेरा पडे
नको तू बांगा व्हऊ ।।४।।
पिरिमना चक्करम्हा
तू नको वाया जाऊ
तिन्हा मागे फिरीसन
तू साल नको बुडाऊ ।।धृ।।
✍️✍️✍️
विजय व्ही.निकम
धामणगाव,चाळीसगाव
दि.२१/३/२०२१
🤔🤔👆👆🤔🤔
कोणत्याही टिप्पण्या नाहीत:
टिप्पणी पोस्ट करा