☘️🌸☘️🌸☘️🌸☘️
*अशी मनले वाटत नही !*
च्या पेतांना कप म्हाईन
च्या बशीम्हा पडत नही !
मिशा बुडाईसन च्याम्हा
तोंडवाटे फुर्का वढतं नही !
*तवलोक च्या पिनुत*
*अशी मनले वाटत नही ...*
तोंडम्हां बरश धरेलवर
कोनाशी बात व्हत नही !
तोज कानले हात लाई
येकदा बहिरा व्हत नही !
*तवलोक दाते घसायनात*
*अशी मनले वाटत नही ...*
नातुना बिस्कुटेस म्हाईन
दोन बिस्कुटे चोरत नही !
नातू आजला सारखाज
अशी सूनबाई म्हनत नही !
*तवलोक बिस्कुट खाद*
*अशी मनले वाटत नही ...*
आंग धोई वल्ला रुमाल
बाजवर जवय पडत नही !
आनी घरम्हाईन धल्लीना
कानवर आलाप पडत नही !
*तवलोक आंग धोय ब्वा*
*अशी मनले वाटत नही ...*
काम वरथुन येलवर
कपडा फेकतस नहीं !
बय गयरा दमनू आज
तोंडवाटे निघत नही !
*तवलोक दमनुत ब्वा*
*अशी मनले वाटत नहीं ...*
कपडास्ना पसारा देखी
बायको संताप करत नही !
रागे रागे जवय खोचाट
दोन टोमना मारत नही !
*तवलोक नवरा से ब्वा*
*अशी मनले वाटत नही ...*
आपलं तसज तिन्ह बी
रोजनं ते काही नवं नही !
माहीत र्हास तरी बी ती
परत आखो बोलत नही !
*तवलोक तिले बायको से*
*अशी तिले वाटत नही ...*
आपीन अशा वागतस
तशी ती बी बोलत र्हास !
भांडाले भांड लागत नही
असं जर रोज घडत नही !
*तवलोक सुखी सौसार से*
*अशी मनले वाटत नही ...*
*✍️✍️कवि✍️✍️*
*विजय व्ही.निकम*
*धामणगाव,चाळीसगाव*
*मो.नं.८८८८९४५३३५*
*दि.१४/३/२०२१*
☘️🌸☘️🌸☘️🌸☘️
कोणत्याही टिप्पण्या नाहीत:
टिप्पणी पोस्ट करा