*[दै. श्रमराज्यदिवाळी अंक २००५ मधून प्रकाशित कविता..]*
अहिरानी खान्देशी बोली भाषा
घट्या =जातं, बहिनाबाईनं घरोटं
🔸️कर साखर पेरणी🔸️
कोठे दवडी जातसं
सासर्वाशिनना बोलं
तुले देखिसनी घट्या
तिन्हा खुलतस बोल॥धृ॥
तुन्हा सारखीच देख
धरतीबी फिरे गोल
कोडं सुटनं सुटनं
चंद्र सुर्य कसा गोल॥१॥
चंद्र सुर्य ना गतच
नियं आभायबी गोल
फिरे तसा घरभर
तुन्हा घरंघरं बोल॥२॥
कोन्ही काही बी म्हनोत
तुन्हा साखरना बोल
बोल बोल घट्या बोल
तुन्हा बोल बहुमोल॥३॥
तुन्हा बोलम्हा भेटस
देख माहेरना बोल
सासर्वाशी ना व्हटम्हा
जास दवडी ज्या बोल॥४॥
आरे माहेरना बोल
त्याले सोनानं रे मोल
घट्या तूच रे जानस
खरा बोल अनमोल॥५॥
देख सोनाना व्हतस
तुन्हा गानाम्हा त्या बोल
कर साखर पेरनी
बोल बोल घट्या बोल॥६॥
*--निसर्गसखी सौ. मंगला मधुकर रोकडे.*
*शब्दसृष्टी*, मास्तरवाडी, नेहरु नगर,देवपूर, धुळे.
दूरध्वनी क्र. :- ९३७१९०२३०३.
🔸️🔸️🔸️🔸️🔸️🔸️🔸️🔸️🔸️🔸️
कोणत्याही टिप्पण्या नाहीत:
टिप्पणी पोस्ट करा